Assalamualaikum wr wb....
Manolah angku, niniak mamak, bundo kanduang sarato dundasak keteknyo ndak bapanggia namo gadangnyo ndak basabuik gala
Ampun baribu kali ampun, ampunkan kami dek pangulu, niniak jo mamak nan gadang basa batuah, urang nan arih bijaksano, suluah bendang adaik limbago
Basusun jari nan sapuluah, batakuakkan kapalo nan satu, jo sambah kami jalang, rila jo maaf kami mintak, ka bakeh mamak nan jo bundo, maafkan kami ka malangkah, rilakan kami ka mangirok.
Kami nan disabuik urang si angku doto, alumni Unand diparantauan, nan taserak di tiok suduik nagari nangko. nan tahimpun dalam carano ALLISKU (Alumni Penulis Kedokteran Unand ) iyolah bamukasuik nak maajak dunsanak kasadonyo, mandanga jo mambaco curito, pantun, gurindam, video, tulisan, patatah patitiah, pokoknyo sagalo nan rancak jo lamak tahidang disiko, tingga dek dunsanak ka manyanduaknyo
Kok ado ereang jo gendeang atau talompek kato, usah manjadi upek puji, maklumlah kami kok nan mudo masih matah, darah nan balum satampuak pinang umua pun balun satahun jaguang, kok nan tuo pun lah tadorong palupo, dek capek kaki kok talangkahkan, dek ringan tangan kok taayunkan, kok tasingguang mamak ka naiak, tagisia pulo dek katurun, maafkan kami tantang itu.
Manolah dunsanak kasadonyo... Pado dirantang panjang-panjang bia dipunta naknyo singkek, diambiak sado kapanguno.
FK Unand dari dahulu lah tasabuik, lataknyo di jalan Jati, manuntuik ilmu harus sungguah2, supayo nagari jadi salamaik
Sambah sagitu kami sabuik, pangulu banyak nan sati, rang gadang banyak nan batuah, tuanku banyak nan kiramaik.
Mako di nan kini nan ko, samulo kaki ka malangkah, samulo tangan ka mangirai, jo dendang diarak sambah tandonyo curito ka dimulai….
Tidak ada komentar:
Posting Komentar