DUDUAKLAH DI LAPIAK NAN SAHALAI

DUDUAKLAH DI LAPIAK NAN SAHALAI 

(Renungan buat IKM & IKMR Pelalawan)
Oleh: Dr. Anda Citra Utama, SpPD

Jo bismillah ambo mulai tulisan ko, alhamdulillah sarato shalawat manyaratoi.
Ado pepatah usang rang awak nan patuik diinok anokkan, baitu bunyinyo; bak manyuruak di lalang sahalai, atau bak manutuik muko jo tapak tangan nan disalo jari tampak juo. Setidaknyo itulah nan dirasokan dek peserta rapek IKM (Ikatan Keluarga Minang) Pelalawan tgl 8 Juli 2020 nan lalu. Agenda nan samulo membahas SK Pengurus IKM dan Rencana Pelantikannyo...lah batuka sajo curito ka soal baa mangko ado duo organisasi Minang di Pelalawan, yaitu IKM dan IKMR. Dima salah pasangnyo tu. Baa mangko kini abih tabudua sumangaik nak berorganisasi sasudah hampia 2 tahun haniang langang digalanggang. Akhirnyo materi nan diagendakan samulo indak dikakok urang do, malah batuka curito ka masalah polemik IKM dan IKMR nan labiah hangat dipabincangkan.
   Memanglah, soal pacahnyo paguyuban Minang ko dirasokan bana dek khalayak sebagai aib nan taserak di nan rami, lah tarang bandarang, bak basuluah jo matohari, co ayam putiah tabang di siang hari. Lai dicubo malampoknyo jo ucapan beberapo dunsanak nan mangatokan; biaso se nyo tu...disinan rancak disiko rancak....makin rami awak makin elok. Tapi tak dapek dipungkiri, lai taraso walau ndak takatokan, saraso ado nan tailan dimato. Kok batanyo beko nan mudo mudo..ma ko kumandan nan ka dituruik, ma ko biduak nan ka ditumpangi. Binguanglah si ulubalang jo ampanglimo titah sia nan ka dituruik. Rusuahlah panumpang ..biduak ma ko nan ka ditumpangi. Nyampang  dapek pulo beko bantuan dari bupati..kama ko ka dibarikan.... Lai ndak ka cando ikan dalam tabek barabuik umpan. Mako jiko diinok anokkan ..dibao bamanuang..disinan hati marusuah...kok bacando itu kini kasudahannyo...lai lah ndak dek salah bundo manganduang ko.
Tapi..sudahlah, kini ndak paralu lai dikaji baa mangko kaduo duonyo samo manugakan marawa, samo maajankan tuah, samo mangaku organisasinyolah nan patuik. Nan ka dicari kini yolah apo kajalan kaluanyo, maminteh sabalun hanyuik..malantai sabalunnyo lapuak..jan sampai kito kasadonyo hondoh poroh masuak jurang.
Mangko pado kesempatan kali ko ambo mengajukan beberapo usulan, alhamdulillah  kok lai takunyah dan talulua dek dunsanak2 ambo..baiak dari IKM maupun IKMR. Mangko ado beberapo usulannyo;

1. Nan paliang rancak yo melebur diri manjadi satu. Jo hati lapang muko nan janiah. Nan gadang menyayangi nan ketek, nan ketek manuruik ka nan gadang. Ciek banderanyo warno merah kuniang hitam. Suruik salangkah untuak maju basamo saribu langkah. Walaupun caro iko nan paliang elok tapi rasonyo jauah panggang dari api, karano kabanyakan urang awak suko bakacak pinggang maajankan tuah. Takuruang nak dilua..taimpik nak diateh.

2. Caro nan kaduo. Kok lai mungkin nan ciek manjadi kapa gadang nan ciek lai jadi sakoci, artinyo kaduonyo samo ado nakhodo nyo, tapi sakoci barado didalam kapa , samo samo barangkek ka tujuan nan satu. Kok nyampang tibo angin bahorok dan kapa tagendeang oleang...ado sakoci nan kamanyalamatkan.

3. Caro nan katigo. Duduak marapak si tigo tungku sajarangan, bamusyawarah mancari kato mupakat, merumuskan atau mambuek format peran IKM dan IKMR. Salah satu contohnyo.... Mangusulkan diterbitkannyo aturan khusus dari Jakarta (DPP) IKM bahwa khusus untuk wilayah Riau ..IKM propinsi nyo adalah langsuang IKMR tapi berinduak ka IKM Pusat,  sahinggo otomatis...turunannyo IKMR Kabupaten Pelalawan menjadi satu jo IKM Pelalawan... banamo IKMR. IKMR Kabupaten bainduak ka IKMR Propinsi dan IKMR Propinsi bainduak ka IKM Pusat. Jadi ndak ado duo paguyuban Minang disatu wilayah/ daerah. Tapi sayangnyo..caro iko ndak ka bisa berjalan mulus kalau bandera nan diusuang IKM pusat balain jo bandera IKMR propinsi, pastilah hancau kabilau jadinyo.

4. Caro nan ka ampek. Kok indak juo nampak jalan nan ka ditampuah lai....dima tibo selah lai, palapeh selah kudo bapacu, dima tumbuah disinan pulo disiangi. Kalaulah baitu kaji tantu umpamo kapa balayia. Kalau kapa gadang lalu tapaso biduak ketek manapi...kok indak manapi beko dihampehan dek riak galombang. Jikok samo kareh lo kaduonyo...yo tajungkanglah kaduonyo. Dan batapuak tanganlah urang nan manonton. Tersenyum manis lawan dari subarang

Antahlah.....ndak jaleh nan ma jalan nan kaditampuah ko. Eloklah kito, niniak mamak, alim ulama, cadiak pandai, tigo tungku sajarangan duduak dilapiak nan sahalai..dibiliak nan satu, walaupun ado sambilan ruang di rumah gadang, molah kito baiyo batido. Disinanlah baru banamo "Minangkabau Saiyo Sakato, saciok bak ayam sadanciang bak basi" Bukan sarupo salamo salaruik nangko, nyo ayam tapi mambebek, nyo basi tapi badantuang.

Salampih daripado itu, kondisi rang minang di Pelalawan  kini rawan sakali timbua perpecahan, apolagi dimusim pilkada nan katibo, dek karano kito ado duo organisasi. Saran ambo ..usah dunsanak bamain akrobat politik mambao bao IKM atau IKMR, alamat basiarak kito kasudahannyo. Kalau nak manjua...jua selah badan surang surang, usah digadaikan pulo organisasi. Tibo upek rang rami beko. Kecuali kalau urang awak bana nan ka diusuang......ha..kito buek bana parang basosoh. Tapi kalau kauntuak mandukuang urang lain nyo...usah rumah gadang nan diruntuahkan.
Hinggo itu dulu dari ambo, kok ado nan talantuang ka naiak, tapijak ka turun, tagisia di nan rami, ampun jo maaf ambo pintokan, ndak ado mukasuik ka manunjuak-ajai. Hanyo sakadar manyampaikan buah rasian.

Wassalamu'alaikum WW. Pangkalan Kerinci 100720
Dr. Anda Citra Utama, SpPD - Sutan Bandaro