MESJID AL-MUHAJJIRIN
Ado ciek ungkapan minang nan rancak, "Santano pisang busuak diateh lamari, lah panek urang batanyo, indak surang juo mangaku sia nan punyo.... baitu pisang lah digoreng manjadi goreng pisang, sado urang diateh rumah bacirabuik, mangaku nan punyo..." .
Sakiro kiro baitu pulo lah nasib Mesjid urang Minang, Mesjid Al-Muhajjirin di Pangkalan Kerinci Pelalawan. Mesjid ko kini mendadak menjadi perhatian duo organisasi Minang di Pelalawan, IKMR (Ikatan Keluarga Minang Riau) dan IKM (Ikatan Keluarga Minang) Pelalawan.
Duo hari nan lapeh, IKMR maundang pengurus mesjid Muhajjirin bersilaturrahmi, yang intinyo menegaskan bahwa Mesjid tsb milik IKMR, karano dahulu riwayat pendiriannyo diprakarsai IKMR. Walaupun ado satu duo pandapek yang mengatokan bahwa mesjid itu milik urang Minang, bukan IKMR, tapi suaro itu tenggelam dalam gadangnyo hasrat mengklaim bahwa mesjid itu milik IKMR.
Tapi dilain pihak, IKM pun maraso berhak mengelola mesjid tsb. karano itu mesjid urang Minang, dan IKM adalah organisasi urang Minang yang sah dan konon pembentukannyo didukuang hampir 100% IK-IK.
Lapeh dari silang pandapek itu, banyak urang nan lupo bahaso setiap masjid itu milik umat Islam. Pengelolanyo buliahlah urang Minang atau IKMR atau siapo sajo. Tapi sudahlah, mungkin itu hanyo soal istilah sajo.
Tapi nan masalah kini, memang dulu mesjid itu dibangun dek urang Minang Pangkalan Kerinci, wakatu itu organisasi minang memang hanyo satu yaitu IKMR. Tapi kini organisasi lah menjadi duo, sebagian urang Minang bernaung dibawah IKMR, sebagian lain dibawah IKM. Walaupun masiang masiang mengklaim organisasinyo nan sah, nan lain tidak absah.
Lantas sia nan berhak mengelola mesjid Muhajjirin. Kini mesjid itu bukan lagi sekedar tempat ibadah tapi sebuah prestise eksistensi organisasi pengelolanya. Mangko disiko urusan agak rumik, apolagi kalau dibaokkan caro bapikia nan sampik.
Kalau dikaji, diinok anokkan, dibaliak baliak sabalun dibalah, kalaulah urang awak ko bijaksana maelo rambuik dalam tapuang, maurai banang nan kusuik,
sabananyo mesjid Muhajjirin bisa manjadi media pemersatu duo organisasi Minang di Pelalawan nangko, kalau dikelola elok elok. Tapi sabaliaknyo, masalah kepemilikan mesjid iko dapek pulo mamparunciang suasana sahinggo timbul perpecahan. Ibarat galeh ratak, bisa utuh baliak kalau pandai marakeknyo, tapi bisa pacah badarai jikok asal dikakok sajo.
Dengan mangatokan bahwa mesjid tsb milik salah satu organisasi sajo indak kan manyalasaikan masalah, malah bisa makin mampakaruah.
Semestinyo IKMR dan IKM dapek duduak dilapiak nan sahalai basamo samo menjadi pengurus di mesjid tsb. Dari mesjid itulah beko akan memancar ruh persatuan dan persaudaraan, sahinggo nan barek dapek samo dipikua, nan ringan dapek pulo samo dijinjiang, ka bukik samo mandaki, kalurah samo manurun, saiyo sakato, saciok bak ayam sadanciang bak basi. Dibawah naungan mesjid hati menjadi barasiah, disinan kusuik ka salasai.
Tapi jikok masiang masiang pandai maajankan tuah sajo, inyo se nan batua, nan lain salah, mako galeh nan lah ratak jadi pacah badarai, kalaulah cando itu usahkan urang lain ka maharagoi, anak kamanakan sendiri pun anggan ka malengoh.
Jadi baa solusi nyo. Hilangkan ambisi nak menguasoi, karano mesjid itu milik urang Minang basamo. Nan paralu bantuaklah Dewan Mesjid atau Badan Kemakmuran Mesjid, nan sabana bana akan memakmurkan mesjid. Caro memakmurkan mesjid dengan meramaikannyo jo kegiatan2 keagamaan. Dewan Mesjid ko merupakan gabungan dari bidang keagamaan IKMR dan IKM. Nan tapampang disitu namo Sekretariat Dewan Mesjid, bukan sekretariat IKMR atau IKM. Memang iko mudah disabuik, sulik dikarajokan. tapi kok jo hati nan barasiah, muko nan janiah, tak ado barek nan tak tapikua, tak ado pulo ringan nan tak tajinjiang. Tapi kok dihadapi jo hati sampik pikiran kusuik, pastilah ndak ciek juo nan ka salasai. Disinan bana pentingnyo jiwa besar pemimpin. Amuah batenggang di nan sampik.
Bagi ambo sendiri, nan mambuek tulisan ko, sebagai labai lantera atau garin musajik, lah lamo mananti nanti pabilo ko musim ka baganti, kasia kunci musajik ka disarahkan, kok dapek tantu iyo ka nan mudo mudo nan capek kaki ringan tangan, kok capek kaki indak panaruang, kok ringan tangan indak pulo pamacah. Baa mangko ka nan mudo, bukan nan tuo. Sasuai pulo jo papatah kito, nan tuo tuo ka tampek batanyo, Nan tuo eloklah mancaliak dari jauah sajo. Usah pulo nan tuo naiak ka galanggang, dek lutuik lah ndak tagok lai, kok tatungkuik beko sabalun sampai diateh galanggang
Nah dunsanak, baitulah sakiro kiro gambaran kito sakarang kini nangko. Harapan ambo bulekkanlah aia jo pambuluah, bulekkanlah kato jo mufakat, duduaklah dilapiak nan sahalai, mancari kato saiyo.
Sagitu dahulu dari ambo, kok ado nan tasingguang ka naiak talando ka turun, baribu ampun jo maaf ambo pintokan.
Wassalamualaikum
Anda Citra Utama, St Bandaro.
290821
Tidak ada komentar:
Posting Komentar